BEST OF SCHNITZELBÄNGG
Y ha vor vier Johr uf em Vehmäärt e junge Muni kauft.
Y hätt nie dänkt, das dä spööter komplett us em Rueder lauft.
Är isch bi de Freiheitstryychler, dört passt er aane, sälle:
Jung und wiiderspänschtig, wenig Gäischt, aber grossi Schälle.
(Heiri)
S Veterinääramt het mr gschriibe,
y sell my drvoor hiete,
myni schööne, groosse Glogge
de Freihäitstryychler z vermiete.
Sy häige uusegfunde, drum syg s wichtig,
dass me mahn:
Uf de Glooge häigi s noch em Tryychle
Spuure vo Rinderwahn.
(Heiri)
Mit dr Schwiz goots langsam abwärts und d’Lüt dien als wie dümmer:
Mir hän Trychler uff dr Strooss,
Buff mit dr EU,
d Krankekasse styggt,
d Armee isch nüt me wärt,
im Winter isches z warm,
im Summer laider au,
d Woonige sin z tüür,
d AHV am Arsch.
Jä das Land liggt bald in Trümmer.
Ainewäg hän mir e Fungge Hoffnig schlussamänd,
Bald fiert jetzt nämlig d Migros Alkohol im Sortimänt.
(Spootschicht Rhygass)
E Hündli namens Laika isch emooldurchs Wältall gflooge.
Drnoo sin us de USA no Äffli noochezooge.
All die Dier im All, imfall, das koschtet Gäld wie Heu,
sin s, statt Hünd und Affe, hüt milliardeschwääri Säu.
(S Dintelimpli)
Corona git s nid, und falls doch,
denn nimm im Fall
eHampfle Globuli,
und sitz näb zwai Grischdall.
Daas rainigt d Aura,
kaa vor beese Wälle schitze
Nur geg di Dummhait
duet das Zyyg halt gaar nyt nitze.
(Dootebainli)
D Frau Meier drüllt im Gundeli
e Rundeli mit em Hundeli.
Hütt het sy ihrem Hundeli
e Glogge umebundeli ...
So duet s Hundeli im Gundeli
sy Rächt uff Freihäit kundeli.
(D Brunzguttere)
