De Bundesrot het weder mol informiert,
er seit s`goht obsi, aber noni wie gschmiert.
Eis nachem andere, wie z`Paris,
drom machet au ned sones Gschiess!
Applaus gits vo de Linke ond Nätte,
"muetlos" säge die Rächte ond Fette.
De Blocher git Note ond tuet motze,
d`Wirtschaft am Bode, es esch zom Chotze.

E de Politik esches halt wie immer,
oder mängisch no vell schlimmer.
Immerhin, es foht langsam a Tage,
e de Friseure goht`s denn an Chrage.

D`Coiffeure chöne bald weder wärke ond schniide
aber mänge wird säge, jo ich loo d`Hoor glaubi sii,
nochli so stoh, ich muess s`Gsicht au inne no tarne,
cha mini Grosschind nonig umarme.
Ond de Abschtand bliibt be zwee Meter,
also machi au wiiter of Strubelpeter.

D`Homeworker die töfet scho hoffe,
d`Boumärt send jo weder offe.
Chasch luschtvoll droflos fiele und säge,
met Hämmere ond Schliife d`Nochbere ploge
aber d`Gärtnereie, die schaffe au set glii
chasch also onschiniert met Blueme verbii.

Aber vel füehle sich emmerno bschisse,
zom Teil gots einige recht verschisse.
Schlemm bliibts för d`Hotel ond Beize,
spare chönnts nur, wenns nömme heize!
Aber schöscht laufe d`Chöschte devo,
ohni Helf wärde das vel ned öberschtoh!

Und mer? Verdorschte tüemmer ned so schnäll,
Vermesse s`Fürobebier aber mängisch scho chli!
Jo ond was bliibt öis schlossändli no derbii?
Halt eifach abwarte und wiiter geduldig sii.
Hoffe, dass mer z`Bärn bald weder informiert
und`s denn besser lauft-ebe, wie gschmiert!