1.
Du bist min, ich bin din,
des solst du gewis sin.
Du bist beslozzen in minem Herzen:
Verloren ist das slüzzelin,
du moust immer drinne sin.

2.
Um Althochdüütsch het`s sich do ghandelt,
doch mit der Zyt het
d`Sproch sich gewandlet.
So händ d`Ritter (leider gstorbe)
mit schamrot no en Frau umworbe.
Hüt wird kei Burscht im Gsicht meh red:
"Kiss me baby, let`s go to bed!"

3.
Die düütschi Sproch isch längscht nüm rein.
Yflüss griechisch und latein,
französisch-und, ihr merke`s guet,
vom Englisch her en riese Fluet.

4.
Hesch es rassigs Fräulein gseh:
"Lueg, das isch en Zahn ganz steil!"
Die Bezeichnig isch passé.
"Hey look, das girl isch gigageil!"

.5
Was geil heisst isch de Lüüte glych.
Das Wort stammt us em Pflanzenrych.
Nimmsch`s Pflänzli weg vom Liecht,
do druuf wird es ganz blass und stänglet uuf,
wird immer schwächer, isch nümme heil,
dem seit mer: "`s Pflänzli, das wird geil."

6.
Ihr wärde sicher dänke: "Halt!-
Die Bedüütig isch mir z`alt."
Ich weiss die andere, be nid taub,
sexygierig, heisst das glaub.`
Ir Umgangssproch, es stimmt zum Teil,
was phantastisch isch, nennsch geil.

7.
Hesch früehner kenneglehrt en nätti
Frau mit Name Käthi,
seisch dem girly nur no Kate,
wenn d`mit ihre abmachsch,
hesch es date.

8.
Gohsch go laufe, denn tuesch walke,
öppis bespreche, das heisst talke.
Wenn the bell rings, schället d`Glogge,
anstatt go seckle, lieber jogge.

9.
Bim Boarde jumpe, denn hesch fun.
Muesch dringend brünzle, hesch en run.
Chasch öppis besser, bisch de king.
Es Ereignis nennt mer happening.

10.
Zum danke säge oder grüsse
hesch früehner fründlech
d`Hand ge müesse.
Hüt mues halt alles englisch sy:
"Give me five!", und d`Handschot y.

11.
Öppis Hübsches find`sch du nice.
Chunnsch i Sumpf, stecksch
du im "Mischt".
Will`s glyche Wort uf englisch git,
seisch churz und bündig eifach-shit!

12.
Bruuchsch en Kick, machsch
bungee jumping.
Abfallpryse nennt mer dumping.
Burn out heisst: Bisch usbrönnt geischtig,
kei Idee, schwach isch d`Leischtig.
Machsch was de Psychiater seit,
gly bisch du wieder up-to-date.

13.
Autos git`s zu Dumpingpryse.
Muesch sie nid chaufe, cha s`nur lease.
D`Strosse wäre gwüss fascht lär,
wenn jede Chare abzahlt wär!

14.
En Handel nennt mer hüt en deal,
glücklechs Ässe happy meal.
Bisch schlächt ufgleit, hesch en spleen.
En junkie, de isch nümme clean.
Hesch früehner Gras gröikt öppedie,
ziehsch hüt en joint i d`Lunge-n-ie.

15.
De Sämi, en Computer-freak,
sitzt vor de Chischte, week for week.
Die ganz Familie isch ihm schnurz,
vor allem d`Ehefrau chunnt z`churz.

16.
Chunnt er des nachts viel spöter hei,
wett er gärn ine, d`Frau rüeft: "Nei!"
De Schlüssel steckt im Schloss vo inne.
"Muesch überlegge, chasch di b`sinne?-
Drück jetz au "enter", denn bisch dinne!"

17.
Chunnt d`Füürwehr z`speede,
muesch uf d`Syte.
Im PC lösche heisst delete.
Isch de Begriff bekannt im Land?
"Delete", wenn mer löscht en Brand?
De Fritz het Durscht, verzwyflet schier,
de Brand deletet er mit Bier!

18.
Am See no oder i de Alpe,
die ganz Familie isch go tschalpe.
A de Zeche oder Färse
hesch halt Blotere ufgläse.
Hüt göhnt s`elei, will
d`Chind nüm wänd,
vom joystick Blose a de Händ.

19.
Game, playe, surfe, chatte,
drumm sind sie sportlech,
ich würd`wette,
nüt meh wärt, das isch de Grund;
sie wärde feisser, sind nüm gsund!

20.
Und wie hämmer`s mit em Ässe?
Das darf ich sicher nid vergässe.
Nähmd d`Chind e feini Spys is Muul:
"Mami, de food isch mega cool!"

21.
Z`eng sind d`Hose und de Chittel.
"Slim fast" wär es Schlankheitsmittel.
Gwicht verlüüre uf die Tour
isch Mischt, ich weiss e besseri Kur:

22.
Tryp meh Sport, das isch de hit!
Friss die Hälfte, so blybsch fit!
Walke, jogge, boarde, bike,
und nid plötzlech afo streike.

23.
Gang is Wasser, bis nid fuul,
vierzig Längene im swimming pool!
Mit Ergyz ziehsch du dur de Trimm,-
so wirsch du no viel faster slim.

24.
Was seit denn do d`Ernährigslehr?
Lightprodukt stöhnd im Verzehr.
Mit em Fett träisch us en fight,
sogar dys Abwäschwasser
chaufsch du light.

25.
Nüm hürate, das isch crazy,
tüend die Junge, wänd elei sy.
So git s`kei kids i Klasse-room,
mir warte uf e baby-boom.

26.
En loser, de verlüürt im Läbe,
au`s Geld blybt a de Händ nid chläbe.
Ich ha gmeint, isch das verby,
en Luuser sei en Luusbueb gsy?

27.
Verschiebsch du öppis, heisst das beame,
schryb ich en Värs, denn tuen ich ryme.-
Händ ihr gmerkt, s`Blatt het sich gwändet,
wich han es düütsches Wort verwändet.

28.
Ich ha mir vorgno, do bim Schrybe,
ich wett bewusst bim Düütsche blybe.
Drum säg ich altehrwürdig: "Hy!"-
Ladies and gentlemen goodbye!"