Es chunnt jetz di Zyt,
chasch mache was d`witt,
öb Guets oder Schlächts,
öb Fiins oder Schitt.
S`heisst denn bi allem,
du merksch das denn gly,
s`wird sicher en Alterserschynig sy.

Das Högerli bisch früehner
im Loufschritt ue,
jetz setzt dir s`schön Wandere
doch scho zue.
Chunnsch i de Hälfti
scho rächt z`schwitze,
bis ue muesch drümol no chly sitze.

Mit der Zyt gits aber no anderi Sache,
die Erschynige sind denn
nümme zum Lache.
Gosch i Chäller,
dänksch d`unde was han i do wölle,
de muesch halt gschwind
use go d`Stägetritt zelle.

Scho bisch wieder in,
wottsch hüt nid go wüsche,
du bruuchsch öppis Guets,
wo di tuet erfrüsche.

Letschthin han i doch
bineme feine Ässe,
vo der schönschte Frou
de Vorname vergässe.
Da isch gar nich schlimm,
seit si no mit Lache,
mir müend haut wieder einisch
Duzi`s mache.

Doch spöter denn wird i
deheim no gwarnet,
i heig doch geschter
en falschi Frou umarmet.
Tüend das doch jetz ned
eso höch amässe,
bis übermorn han i das
scho wieder vergässe.

S`git haut Erschynige,
die tüend di no freue,
sowieso settsch im Alter
gar nüt me bereue.
So Erschynige händ ou en teufere Sinn,
si bringe denn mängisch
en seelische Gwinn.
Si sind nid nur schlächt,
si chöne ou nütze
und eus im Alter
vor Dummheite schütze.

S`git aber Alterserschynige längeri meh,
do tüend dir haut d`Chneu
und de Rügge weh.
Denn salbisch rächt i mit Perskindol
und scho isch dir wieder vögeliwohl.

Drum lo di ned brämse,
ned hetze, nid triebe,
mach immer schön das,
was`no magsch verlyde.
So loht sich guet läbe-
und als gsetztere Maa
darfsch ruhig
e paar Alterserschynige ha.