Littering

Was heisst das Wörtli Littering?
Was bedütet de das frömdi Ding?
I cha ned änglisch, chome nid drus,
i frog drom en Schreftglehrte uus.

De drückt uf sim Händy denn hin ond här,
uf düütsch übersetze isch würkli no schwär.
Drum frog i jetzt euch, zu dene Sache,
wer tuet das Littering eigentlich mache?

Sinds die wo ganz Säck voll Unrot bringe,
sind die ächt gsy go litteringe?
Sinds die wo ihri Freiheit nütze,
die ganzi Umwält tüend verschmutze?

Müend s`Änglisch gar nid übertriebe,
chönnt d`Souerei uf dütsch abschriebe,
so dass es jedermann verstoht
ond kene si Dräck ligge loht.

I säges allne Umwältsünder,
sind ou es Vorbild eusne Chinder.
Stöhnd i, förne schöni, suberi Wält
das brengt vill Freud und spart eus Gäld.

Chasch überall so Chübu finde,
das Züg chasch gratis lo verschwinde.
Ond findsch mol keine, sig so frei,
nimmsch mol de Abfall grad mit hei.
So tuet dir d`Umwält härzlich danke
und littering choscht di kei Franke.

Ich freu mich immer über diese kleinen schönen Gedichte von dir, das sind vertraute Klänge in meinem Ohr und ich lese sie mir auch immer laut vor ;)