Bisch denn endlich pensioniert, wirsch gseh was alls passiert:
Di Frau stellt dii zo allem aa, jetz häsch die guete Zyte ghaa.
Ich säge dir, das gitt no Sache meh zum brüele als zum lache,
am Morge gohts bi zyte aa bevor du no hesch Zmorge ghaa.

Helfe muesch de Frau zum Nutze d`Stube lüfte, usebutze
Zimmer fluume und no meh ihr sötted das emole gseh.
S`Gschirr abwäsche sowieso i cha das eifach nöd verstoh
i glaub, i chönti grad no wette jetz mues i au no gogo bette.

Muesch go poschte mit de Täsche und no Sache usewäsche
Underhose und au Liibli Büstehalter vo dim Wiibli.
Und wenn i denn mues go poschte dörfs denn,
jo nöd zuviel choste,
muesch pressiere, chum denn glii,
und wenni chumm: Wo bisch au gsii?

Alewanti, dörfsch nöd warte nochher muesch denn no in Garte,
umestäche, jäte, mähie und au grad no dRüebli säie.
dSetzlig chasch au no pikiere also los, nöd lang studiere
söttisch au no dStube spöhnle hesch kei Zyt zum umeflöhnle.

Hett ich gern emol en Tropfe mueni zerscht go Teppich chlopfe,
darf nöd muule und nöd lache sös mues i au no Kafi mache.
Härdöpfel söttisch auno schwelle de Abfallchübel usestelle,
chasch mer säge was du witt en Pensionär macht eine mit.

Me hätt kei Rueh, me hett kei Rascht
immer heissts: du chascht-du chascht!
Gäbs nomol en Bueb, en schwäre müest i denk au no dää gebäre!
So goht das zue in einem fort immer hett sie s`letschte Wort,
doo hani gseit: jetz ische gnue i mache doch nöd immer d`Chueh!

Au ide Nacht han ich kei Rueh denn mini Frau seit näbezue:
S`schnarche sigi doo verbotte es werded zNacht kei Rüebli gsotte.
Chasch em Verkehrsverein no schribe
du wölisch nüme dindebliibe,
weg dem Verchehr wo mir no hei zahle mir nöd no zwänzg Schtei!

Do hani gseit: i nimm mir s`Läbe das mach i nüme alls vergäbe.
Am sechsi gohn i under d`Bahn es isch mer Ernst, nöd nur en Wahn.
Do rüeft sie mer no hindenoh,
wenn`d denn öppe nöd magsch gkoh
chasch am siebni au no goh.
Säb sig gschieter und au heller
säb Zügli fahri viel viel schneller!

Jetz wird`s mir denn doch langsam z`dick.
Das isch jo schlimmer als d`Fabrik.
Dett gitts doch Ferie und no Geld diheim bisch umesöst aagstellt.
Sie lönd eim eifach nöd in Rueh zum gang go-Club ghörscht jetz dezue
gang go poschte-gang go wösche gang hol Geld und gang go tische.

I mag zwor cheibe viel verträge öppis aber mues i säge:
Das goht zrugg ufs Paradies wo d`Eva hett jo als Bewies
de Aastand doo scho ganz vergässe und de Öpfel zerscht aagfrässe!!!